കാൻബറ: ഓസ്ട്രേലിയൻ വിസ വിപണിയിലെ തട്ടിപ്പുകൾ തടയുന്നതിന്റെ ഭാഗമായി ഓഫിസ് ഓഫ് ദ മൈഗ്രേഷൻ ഏജന്റ്സ് രജിസ്ട്രേഷൻ അതോറിറ്റി (OMARA) കർശന നടപടികൾ സ്വീകരിച്ചു. ഈ സാമ്പത്തിക വർഷം മാത്രം നിയമവിരുദ്ധ പ്രവർത്തനങ്ങളിൽ ഏർപ്പെട്ട 14 രജിസ്ട്രേഡ് മൈഗ്രേഷൻ ഏജന്റുമാരുടെ ലൈസൻസ് അതോറിറ്റി റദ്ദാക്കുകയോ മറ്റ് ശിക്ഷാ നടപടികൾ സ്വീകരിക്കുകയോ ചെയ്തു.
വ്യാജ രേഖകൾ സമർപ്പിക്കുക, അപേക്ഷകരിൽ നിന്നും പണം വാങ്ങി വഞ്ചിക്കുക, തെറ്റായ വാഗ്ദാനങ്ങൾ നൽകി വിസ നടപടികൾ വൈകിപ്പിക്കുക തുടങ്ങിയ ഗുരുതരമായ കുറ്റങ്ങൾക്കാണ് ഏജന്റുമാർക്കെതിരെ നടപടിയെടുത്തത്. ഇതിൽ സിഡ്നി ആസ്ഥാനമായി പ്രവർത്തിച്ചിരുന്ന ചില പ്രമുഖ ഏജൻസികളും ഉൾപ്പെടുന്നു.
ഏപ്രിൽ 1 മുതൽ പ്രാബല്യത്തിൽ വന്ന പുതിയ നിയമങ്ങൾ പ്രകാരം മൈഗ്രേഷൻ ഏജന്റുമാർക്ക് കർശനമായ പെരുമാറ്റച്ചട്ടങ്ങൾ (Code of Conduct) ഏർപ്പെടുത്തിയിട്ടുണ്ട്. ഏജന്റുമാരുടെ യോഗ്യത പരിശോധിക്കുന്നതിനും ഇംഗ്ലീഷ് ഭാഷാ പ്രാവീണ്യം ഉറപ്പാക്കുന്നതിനും പുതിയ മാനദണ്ഡങ്ങൾ നിലവിൽ വന്നു.
വിസിറ്റർ വിസയിലോ ട്രാൻസിറ്റ് വിസയിലോ എത്തിയാൽ ജോലി നൽകാമെന്ന് വാഗ്ദാനം ചെയ്യുന്ന വ്യാജ ഏജന്റുമാരെ സൂക്ഷിക്കണമെന്ന് ആഭ്യന്തര വകുപ്പ് മുന്നറിയിപ്പ് നൽകി. ഫാം ജോലികൾക്കും മറ്റും എളുപ്പത്തിൽ വർക്ക് വിസ വാഗ്ദാനം ചെയ്യുന്നതാണ് നിലവിലെ പ്രധാന തട്ടിപ്പ് രീതി.
പ്രഖ്യാപിക്കാനിരിക്കുന്ന പുതിയ കുടിയേറ്റ നയത്തിന്റെ ഭാഗമായി വിസ അപേക്ഷകരുടെ സോഷ്യൽ മീഡിയ ഇടപെടലുകൾ പരിശോധിക്കാനും തട്ടിപ്പുകാരെ കണ്ടെത്താനും കൂടുതൽ സാങ്കേതിക വിദ്യകൾ ഉപയോഗിക്കുമെന്ന് അധികൃതർ വ്യക്തമാക്കി.
വിസ അപേക്ഷകർ തങ്ങളുടെ ഏജന്റുമാർ രജിസ്റ്റർ ചെയ്തവരാണോ എന്ന് OMARA വെബ്സൈറ്റ് (mara.gov.au) വഴി പരിശോധിക്കണമെന്നും അല്ലാത്തപക്ഷം സാമ്പത്തിക നഷ്ടത്തിനും വിസ റദ്ദാക്കലിനും സാധ്യതയുണ്ടെന്നും സർക്കാർ വക്താവ് അറിയിച്ചു. തട്ടിപ്പിനിരയായാൽ ഉടൻ തന്നെ ‘ബോർഡർ വാച്ചിന്’ (Border Watch) റിപ്പോർട്ട് ചെയ്യണമെന്നും നിർദ്ദേശമുണ്ട്.
