ലണ്ടൻ: ഇറാൻ-അമേരിക്ക സംഘർഷത്തെത്തുടർന്ന് തടസ്സപ്പെട്ട ഹോർമുസ് കടലിടുക്കിലെ എണ്ണവ്യാപാരം പുനഃസ്ഥാപിക്കുന്നതിനായുള്ള വൻ സമാധാന ദൗത്യത്തിൽ ഓസ്ട്രേലിയയും പങ്കാളിയാകുന്നു. ഹോർമുസ് കടലിടുക്ക് വഴി സുരക്ഷിതമായ എണ്ണനീക്കം ഉറപ്പാക്കാൻ ബ്രിട്ടനും ഫ്രാൻസും നയിക്കുന്ന 49 രാജ്യങ്ങളുടെ സഖ്യമാണ് സമാധാന സേനയ്ക്ക് രൂപം നൽകുന്നത്. വിഷയത്തിൽ അന്തിമ ധാരണയായാലുടൻ ഓസ്ട്രേലിയ ദൗത്യത്തിന്റെ ഭാഗമാകും. ഇതുമായി ബന്ധപ്പെട്ട കൂടുതൽ ചർച്ചകൾ ഈ ആഴ്ച ലണ്ടനിൽ നടക്കും.
തങ്ങളുടെ തുറമുഖങ്ങൾക്ക് മേലുള്ള ഉപരോധം നീക്കാൻ അമേരിക്ക വിസമ്മതിച്ചതിനെത്തുടർന്ന് ഇറാൻ രണ്ട് എണ്ണക്കപ്പലുകൾക്ക് നേരെ വെടിയുതിർത്തതായും കടലിടുക്ക് ഭാഗികമായി തടഞ്ഞതായും ആരോപണമുയർന്നിരുന്നു. ഇതേത്തുടർന്ന് ആഗോള ഇന്ധന വിതരണ ശൃംഖല താറുമാറായ സാഹചര്യത്തിലാണ് അന്താരാഷ്ട്ര ഇടപെടൽ ശക്തമായത്. ആഗോള വിപണിയിൽ എണ്ണവില നിയന്ത്രിക്കുന്നതിനും ഇന്ധന ലഭ്യത ഉറപ്പാക്കുന്നതിനും ഹോർമുസ് കടലിടുക്ക് തുറന്നുകിടക്കേണ്ടത് ഓസ്ട്രേലിയയെ സംബന്ധിച്ചിടത്തോളം അനിവാര്യമാണെന്ന് പ്രതിരോധ മന്ത്രി റിച്ചാർഡ് മാർലെസ് പറഞ്ഞു.
നിലവിൽ മേഖലയിലുള്ള ഓസ്ട്രേലിയയുടെ അത്യാധുനിക നിരീക്ഷണ വിമാനമായ ‘E7 വെഡ്ജ്ടെയിൽ’ (E7 Wedgetail) സമാധാന ദൗത്യത്തിനായി വിട്ടുനൽകാനാണ് സാധ്യത. ബ്രിട്ടൻ, ഫ്രാൻസ്, അമേരിക്ക തുടങ്ങിയ രാജ്യങ്ങളുമായി സഹകരിച്ച് പ്രവർത്തിക്കുമെങ്കിലും ഏതൊക്കെ സേവനങ്ങളാണ് ഓസ്ട്രേലിയ നൽകുകയെന്ന കാര്യത്തിൽ ലണ്ടനിലെ കൂടിക്കാഴ്ചയ്ക്ക് ശേഷമേ തീരുമാനമുണ്ടാകൂ. എണ്ണക്കപ്പലുകളുടെ സുരക്ഷിതമായ യാത്ര ഉറപ്പാക്കാൻ ഓസ്ട്രേലിയ ഇടപെടണമെന്ന് പ്രതിപക്ഷവും സർക്കാരിനോട് ആവശ്യപ്പെട്ടിട്ടുണ്ട്.
ഹോർമുസ് കടലിടുക്ക് വീണ്ടും തുറന്നതോടെ ആഗോള വിപണിയിൽ എണ്ണവിലയിൽ പെട്ടെന്ന് കുറവുണ്ടായിട്ടുണ്ട്. ദൗത്യം വിജയകരമായി പൂർത്തിയായാൽ ഇന്ധനവില സ്ഥിരമായി കുറയുമെന്നാണ് ഓസ്ട്രേലിയയുടെയും മറ്റ് രാജ്യങ്ങളുടെയും പ്രതീക്ഷ. യുണൈറ്റഡ് കിംഗ്ഡം പ്രധാനമന്ത്രി കെയർ സ്റ്റാർമർ ഈ ദൗത്യം എല്ലാ രാജ്യങ്ങൾക്കും നിർണ്ണായകമാണെന്ന് വ്യക്തമാക്കിയിട്ടുണ്ട്. അതേസമയം, ദൗത്യത്തിൽ ചൈന പങ്കാളിയാകുമ്പോൾ അമേരിക്ക വിട്ടുനിൽക്കുകയാണ്. സമാധാനം പുനഃസ്ഥാപിക്കാനുള്ള ശ്രമങ്ങൾ വെല്ലുവിളിയാണെങ്കിലും അന്താരാഷ്ട്ര പങ്കാളികളുമായി ചേർന്ന് പ്രതിസന്ധി മറികടക്കാനുള്ള ശ്രമങ്ങൾ തുടരുകയാണെന്ന് പ്രതിരോധ വ്യവസായ മന്ത്രി പാറ്റ് കൺറോയ് അറിയിച്ചു.
