ന്യൂഡൽഹി: പഞ്ചാബിലെ ജലന്ധറും അമൃത്സറും ഉൾപ്പെടെ രണ്ട് സ്ഥലങ്ങളിൽ ഉണ്ടായ സ്ഫോടനങ്ങളെ തുടർന്ന് സംസ്ഥാനത്ത് സുരക്ഷ ശക്തമാക്കി ഹൈ അലർട്ട് പ്രഖ്യാപിച്ചു.ജാലന്ധറിൽ ബോർഡർ സെക്യൂരിറ്റി ഫോഴ്സ് (BSF) പഞ്ചാബ് ഫ്രണ്ടിയർ ആസ്ഥാനം സമീപം പാർക്ക് ചെയ്തിരുന്ന സ്കൂട്ടറിലാണ് സ്ഫോടനം ഉണ്ടായത്. സംഭവത്തിൽ ചെറിയ തോതിൽ നാശനഷ്ടം ഉണ്ടായതായി റിപ്പോർട്ടുകളുണ്ട്. പരിക്കുകളെക്കുറിച്ച് വ്യക്തമായ വിവരം ലഭ്യമല്ല.
ഇതിന് പിന്നാലെ അമൃത്സറിലെ സൈനിക ക്യാമ്പിന് സമീപവും മറ്റൊരു സ്ഫോടനം റിപ്പോർട്ട് ചെയ്തു. സുരക്ഷാ മേഖലയ്ക്ക് സമീപം ഉണ്ടായ ഈ സംഭവം ആശങ്ക ഉയർത്തിയിട്ടുണ്ട്.രണ്ട് സംഭവങ്ങളും മണിക്കൂറുകൾക്കുള്ളിൽ നടന്നതോടെ സുരക്ഷാ ഏജൻസികൾ അന്വേഷണം ശക്തമാക്കി. ബോംബ് നിർവീര്യപ്പെടുത്തൽ സംഘവും ഫോറൻസിക് വിദഗ്ധരും സ്ഥലങ്ങളിൽ പരിശോധന നടത്തി. സ്ഫോടനങ്ങളുടെ സ്വഭാവം വ്യക്തമാക്കുന്നതിനുള്ള അന്വേഷണം തുടരുകയാണ്.
സംഭവങ്ങൾക്ക് പിന്നിൽ ആരാണെന്നത് വ്യക്തമല്ല. ചില സംഘടനകൾ ഉത്തരവാദിത്വം ഏറ്റെടുത്തതായി റിപ്പോർട്ടുകളുണ്ടെങ്കിലും ഔദ്യോഗിക സ്ഥിരീകരണം ലഭിച്ചിട്ടില്ല.സംസ്ഥാനത്തുടനീളം സുരക്ഷ ശക്തമാക്കിയതായി അധികൃതർ അറിയിച്ചു.
