ജമ്മുകശ്മീരിലെ രജൗരി ജില്ലയിൽ നിയന്ത്രണരേഖയ്ക്ക് (LoC) സമീപം ഉണ്ടായ കുഴിബോംബ് സ്ഫോടനത്തിൽ നാല് ഇന്ത്യൻ സൈനികർക്ക് പരിക്കേറ്റു. ചൊവ്വാഴ്ച പതിവ് പട്രോളിങ്ങിനിടെ അബദ്ധത്തിൽ കുഴിബോംബ് പൊട്ടിത്തെറിച്ചതാണ് അപകടത്തിന് കാരണമായതെന്ന് സൈനിക വൃത്തങ്ങൾ അറിയിച്ചു.
രജൗരിയിലെ നൗഷേര സെക്ടറിലെ കാലൽ ഫോർവേഡ് ഏരിയയിലാണ് സ്ഫോടനം നടന്നത്. പരിക്കേറ്റവരിൽ ഒരു ജൂനിയർ കമ്മിഷൻഡ് ഓഫീസറും (JCO) ഉൾപ്പെട്ടിട്ടുണ്ട്. എല്ലാവരെയും ഉടൻ ആശുപത്രിയിലേക്ക് മാറ്റി ചികിത്സ നൽകി വരികയാണെന്നും ഇവരുടെ ആരോഗ്യനില തൃപ്തികരമാണെന്നും അധികൃതർ അറിയിച്ചു.
നിയന്ത്രണരേഖയ്ക്കു സമീപമുള്ള മേഖലകളിൽ പട്രോളിങ് നടത്തുന്ന സൈനികർക്ക് കുഴിബോംബുകൾ ഇപ്പോഴും വലിയ ഭീഷണിയായി തുടരുന്ന സാഹചര്യത്തിലാണ് ഈ അപകടം ഉണ്ടായത്. സംഭവത്തെ തുടർന്ന് സുരക്ഷാ നടപടികൾ കൂടുതൽ ശക്തമാക്കിയിട്ടുണ്ട്.
