ടെഹ്റാൻ: ഇറാൻ പ്രസിഡന്റ് മസൂദ് പെസെഷ്കിയൻ പരമോന്നത നേതാവ് ആയത്തൊള്ള മൊജ്തബ ഖമേനിയെ സന്ദർശിച്ചതായി ഖമേനിയുടെ ഓഫീസ് അറിയിച്ചു. കൂടിക്കാഴ്ചയുടെ കൃത്യമായ തീയതി അധികൃതർ പുറത്തുവിട്ടിട്ടില്ല.
രാജ്യത്തെ നിലവിലെ സാഹചര്യം, ഭാവിയിലെ സാധ്യതകൾ എന്നിവ ഇരുവരും ചർച്ച ചെയ്തതായാണ് ഖമേനിയുടെ ഓഫീസ് അറിയിച്ചത്. സൈനിക കാര്യങ്ങൾ, സമ്പദ്വ്യവസ്ഥ, ഊർജ ഉപയോഗം, അന്താരാഷ്ട്ര സാമ്പത്തിക ബന്ധങ്ങൾ തുടങ്ങിയ വിഷയങ്ങളും ചർച്ചയായതായി Reuters റിപ്പോർട്ട് ചെയ്തു.
ഫെബ്രുവരിയിൽ അമേരിക്ക-ഇസ്രയേൽ ആക്രമണത്തിൽ മൊജ്തബ ഖമേനിക്ക് പരിക്കേറ്റതായും ഗുരുതരാവസ്ഥയിലാണെന്നും നേരത്തെ റിപ്പോർട്ടുകളുണ്ടായിരുന്നു. ചുമതലയേറ്റശേഷം അദ്ദേഹം പൊതുവേദിയിൽ അപൂർവമായേ പ്രത്യക്ഷപ്പെട്ടിട്ടുള്ളൂ. ഇതോടെ അദ്ദേഹത്തിന്റെ ആരോഗ്യനിലയെക്കുറിച്ച് അഭ്യൂഹങ്ങളും ഉയർന്നിരുന്നു.
അതിനിടെ, മൊജ്തബ ഖമേനി ജനങ്ങൾക്കിടയിലും ഔദ്യോഗിക യോഗങ്ങളിലും പങ്കെടുക്കുന്ന ദൃശ്യങ്ങൾ വരും ദിവസങ്ങളിൽ പുറത്തുവിടുമെന്ന് ഇറാന്റെ റെവല്യൂഷണറി ഗാർഡ്സ് അറിയിച്ചിട്ടുണ്ട്.
