മിഡിൽ ഈസ്റ്റ് മേഖലയിലെ വർധിച്ചുവരുന്ന സംഘർഷ സാഹചര്യത്തിൽ, ഹോർമുസ് കടലിടുക്ക് രാഷ്ട്രീയ സമ്മർദ്ദത്തിനുള്ള ഉപാധിയായി ഉപയോഗിക്കരുതെന്ന് ഖത്തർ വ്യക്തമാക്കി. ഖത്തർ വിദേശകാര്യ മന്ത്രാലയ വക്താവ് മജീദ് അൽ-അൻസാരി നടത്തിയ പ്രസ്താവനയിലാണ് ഈ മുന്നറിയിപ്പ്.
അദ്ദേഹം പറഞ്ഞത്, ആഗോള ഊർജ വിതരണത്തിനും വ്യാപാരത്തിനും നിർണായകമായ ഹോർമുസ് കടലിടുക്ക് പോലുള്ള സമുദ്രപാതകളുടെ സുരക്ഷ ഉറപ്പാക്കുന്നത് അന്താരാഷ്ട്ര സമൂഹത്തിന്റെ പൊതുഉത്തരവാദിത്വമാണെന്നാണ്. ഇത്തരം പ്രധാന ജലപാതങ്ങളെ രാഷ്ട്രീയമായോ സൈനികമായോ സമ്മർദ്ദ ഉപാധിയായി ഉപയോഗിക്കുന്നത് അംഗീകരിക്കാനാകില്ലെന്നും ഖത്തർ വ്യക്തമാക്കി.
അമേരിക്കയും ഇറാനും തമ്മിലുള്ള സംഘർഷവും സമാധാന ചർച്ചകളിലെ അനിശ്ചിതത്വവും തുടരുന്ന സാഹചര്യത്തിലാണ് ഖത്തറിന്റെ ഈ പ്രതികരണം. ഈ മേഖലയിലെ പ്രശ്നങ്ങൾ പരിഹരിക്കാൻ എല്ലാ പക്ഷങ്ങളും നയതന്ത്ര മാർഗങ്ങൾ സ്വീകരിക്കണമെന്നും ഖത്തർ ആവശ്യപ്പെട്ടു.
ലോകത്തിലെ എണ്ണവിതരണത്തിന്റെ വലിയൊരു വിഹിതം ഹോർമുസ് കടലിടുക്ക് വഴിയാണ് കടന്നുപോകുന്നത്. അതിനാൽ ഇവിടെ ഉണ്ടാകുന്ന ഏത് തരത്തിലുള്ള തടസ്സവും ആഗോള സാമ്പത്തിക മേഖലയെ ബാധിക്കാനിടയുണ്ടെന്ന് വിദഗ്ധർ മുന്നറിയിപ്പ് നൽകുന്നു.
