സ്ഥാനാർഥി ശോഭ സുരേന്ദ്രനെതിരെ ഉയർന്ന “വോട്ടിന് നോട്ട്” ആരോപണത്തിൽ ജില്ലാ കളക്ടർ ഇന്ന് മുഖ്യതെരഞ്ഞെടുപ്പ് ഓഫീസർക്ക് റിപ്പോർട്ട് സമർപ്പിക്കും.
കണ്ണാടി പഞ്ചായത്തിലെ തെരുവാക്കുറിശി പ്രദേശത്തെ ഒരു വയോധികയ്ക്ക് പണം നൽകുന്ന ദൃശ്യങ്ങൾ പുറത്തുവന്നതിനെ തുടർന്നാണ് വിവാദം ഉയർന്നത്. ശോഭ സുരേന്ദ്രന്റെ നേതൃത്വത്തിൽ എത്തിയ പ്രവർത്തകരോടൊപ്പം ഉണ്ടായിരുന്ന ഒരു യുവതി പണം കൈമാറിയതായാണ് ആരോപണം.
ഇതിന് പിന്നാലെ, പണവും സാരിയും നൽകി വോട്ടർമാരെ സ്വാധീനിക്കാൻ ശ്രമിച്ചെന്നാരോപിച്ച് കോൺഗ്രസ് ദൃശ്യങ്ങൾ പുറത്തുവിട്ടു. എന്നാൽ ആരോപണങ്ങൾ ശോഭ സുരേന്ദ്രൻ നിഷേധിച്ചു. പണം നൽകിയ വനിത കോൺഗ്രസ് അയച്ച ആളാണെന്നായിരുന്നു അവരുടെ വിശദീകരണം.
പണം ലഭിച്ചതായി ആദ്യം സമ്മതിച്ച വയോധിക പിന്നീട് പ്രസ്താവന തിരുത്തിയതും അന്വേഷണത്തിൽ ശ്രദ്ധേയമായ ഘടകമാണ്. സംഭവത്തിന്റെ ഗൗരവം കണക്കിലെടുത്ത് വിശദമായ റിപ്പോർട്ട് തയ്യാറാക്കി സമർപ്പിക്കാനാണ് അധികൃതരുടെ തീരുമാനം.
