കൊൽക്കത്ത: പശ്ചിമ ബംഗാൾ നിയമസഭ തിരഞ്ഞെടുപ്പിനിടെ ക്രമക്കേടുകൾ റിപ്പോർട്ട് ചെയ്ത പശ്ചാത്തലത്തിൽ 15 പോളിംഗ് ബൂത്തുകളിൽ ഇന്ന് (മെയ് 2) പുനർവോട്ടെടുപ്പ് നടത്തുന്നു. സൗത്ത് 24 പരഗണാസ് ജില്ലയിലെ രണ്ട് മണ്ഡലങ്ങളായ മഗ്രഹട്ട് പശ്ചിം, ഡയമണ്ട് ഹാർബർ എന്നിവിടങ്ങളിലാണ് റീപോളിംഗ് നടക്കുന്നത്.
ഈ ബൂത്തുകളിൽ രണ്ടാംഘട്ട വോട്ടെടുപ്പ് നടന്ന ഏപ്രിൽ 29-നുണ്ടായ ക്രമക്കേടുകളെയും ഇവിഎം (EVM) സംബന്ധിച്ച പരാതികളെയും തുടർന്നാണ് തിരഞ്ഞെടുപ്പ് കമ്മീഷൻ വീണ്ടും വോട്ടെടുപ്പ് നടത്താൻ ഉത്തരവിട്ടത്.
മൊത്തം 15 ബൂത്തുകളിൽ 11 എണ്ണം മഗ്രഹട്ട് പശ്ചിം മണ്ഡലത്തിലും 4 എണ്ണം ഡയമണ്ട് ഹാർബർ മണ്ഡലത്തിലുമാണ്. രാവിലെ 7 മുതൽ വൈകിട്ട് 6 വരെ വോട്ടെടുപ്പ് നടക്കും.കടുത്ത സുരക്ഷാ സംവിധാനങ്ങളോടെയാണ് റീപോളിംഗ് നടക്കുന്നത്. രാവിലെ തന്നെ വോട്ടർമാരുടെ സാന്നിധ്യം ശ്രദ്ധേയമായിരുന്നുവെന്നും ആദ്യ മണിക്കൂറുകളിൽ തന്നെ ശ്രദ്ധേയമായ പോളിംഗ് രേഖപ്പെടുത്തിയതായും റിപ്പോർട്ടുകൾ സൂചിപ്പിക്കുന്നു.
സംസ്ഥാനത്ത് രണ്ട് ഘട്ടങ്ങളിലായി നടന്ന തിരഞ്ഞെടുപ്പിന്റെ ഫലങ്ങൾ മേയ് 4-നാണ് പ്രഖ്യാപിക്കുക.പുനർവോട്ടെടുപ്പ് നടപടികൾ തിരഞ്ഞെടുപ്പ് പ്രക്രിയയുടെ വിശ്വാസ്യത ഉറപ്പാക്കുന്നതിനുള്ള കമ്മീഷന്റെ ഇടപെടലായാണ് വിലയിരുത്തുന്നത്.
