ന്യൂഡൽഹി: പാർലമെന്റിലും നിയമസഭകളിലും സ്ത്രീകൾക്ക് 33 ശതമാനം സംവരണം ഉറപ്പാക്കുന്നതിനുള്ള ഭരണഘടനാ ഭേദഗതി ബിൽ (131-ാം ഭേദഗതി) ലോക്സഭയിൽ പരാജയപ്പെട്ടു. വെള്ളിയാഴ്ച നടന്ന വോട്ടെടുപ്പിൽ ബിൽ പാസാക്കുന്നതിന് ആവശ്യമായ മൂന്നിൽ രണ്ട് ഭൂരിപക്ഷം ലഭിക്കാത്തതിനെത്തുടർന്നാണ് ബിൽ തള്ളപ്പെട്ടത്. ഭരണകക്ഷിയായ എൻ.ഡി.എ സഖ്യത്തിന് ആവശ്യമായ 360 വോട്ടുകൾ സമാഹരിക്കാൻ കഴിയാതെ വന്നത് സർക്കാരിന് വലിയ രാഷ്ട്രീയ തിരിച്ചടിയായി.
ഭരണഘടനാ ഭേദഗതിക്ക് ആവശ്യമായ സ്പെഷ്യൽ മജോറിറ്റി (ഹാജരുള്ളവരുടെ മൂന്നിൽ രണ്ട് ഭാഗം) തെളിയിക്കാൻ സർക്കാരിന് സാധിച്ചില്ല. ലോക്സഭാ അംഗസംഖ്യ വർദ്ധിപ്പിക്കുന്നതും മണ്ഡല പുനർനിർണ്ണയവും (Delimitation) വനിതാ സംവരണവുമായി ബന്ധിപ്പിക്കാനുള്ള നീക്കമാണ് പ്രധാനമായും പ്രതിസന്ധിയിലായത്.
വനിതാ സംവരണം നടപ്പിലാക്കുന്നത് മണ്ഡല പുനർനിർണ്ണയത്തിന് ശേഷം മതി എന്ന വ്യവസ്ഥയെ പ്രതിപക്ഷം ശക്തമായി എതിർത്തു. ദക്ഷിണേന്ത്യൻ സംസ്ഥാനങ്ങൾക്ക് ലോക്സഭയിലെ പ്രാതിനിധ്യം കുറയാൻ ഇത് കാരണമാകുമെന്ന് ചൂണ്ടിക്കാട്ടി തമിഴ്നാട് മുഖ്യമന്ത്രി എം.കെ. സ്റ്റാലിൻ ഉൾപ്പെടെയുള്ള നേതാക്കൾ പ്രതിഷേധിച്ചിരുന്നു.
2029-ലെ പൊതുതിരഞ്ഞെടുപ്പിന് മുൻപായി വനിതാ സംവരണം നടപ്പിലാക്കുക എന്ന ലക്ഷ്യത്തോടെയാണ് സർക്കാർ ഈ ബിൽ കൊണ്ടുവന്നത്. എന്നാൽ സഭയിൽ ഭൂരിപക്ഷം തെളിയിക്കാൻ കഴിയാത്തതോടെ ഈ നിയമത്തിന്റെ ഭാവി അനിശ്ചിതത്വത്തിലായിരിക്കുകയാണ്.നിലവിൽ ഇന്ത്യൻ ലോക്സഭയിലെ വനിതാ പ്രാതിനിധ്യം 13.6 ശതമാനമാണ് (75 അംഗങ്ങൾ). ഇത് വർദ്ധിപ്പിക്കാനുള്ള ചരിത്രപരമായ നീക്കമാണ് വോട്ടെടുപ്പിലെ പരാജയത്തോടെ തടസ്സപ്പെട്ടിരിക്കുന്നത്
