കവരത്തി: ലക്ഷദ്വീപ്, ആൻഡമാൻ നിക്കോബാർ ദ്വീപ് സമൂഹങ്ങളിലെ മത്സ്യബന്ധന മേഖലയുടെ പുരോഗതിക്കായി കേന്ദ്ര സർക്കാർ പുതിയ പരിഷ്കാരങ്ങൾ നടപ്പിലാക്കാനൊരുങ്ങുന്നതായി ലക്ഷദ്വീപ് ഫിഷറീസ് വകുപ്പ് അറിയിച്ചു. കേന്ദ്ര ഉപഭോക്തൃകാര്യ-ഭക്ഷ്യ-പൊതുവിതരണ മന്ത്രി പീയൂഷ് ഗോയൽ, കേന്ദ്ര ഫിഷറീസ്-മൃഗസംരക്ഷണ വകുപ്പ് മന്ത്രി രാജീവ് രഞ്ജൻ സിംഗ് എന്നിവരുടെ നേതൃത്വത്തിൽ ന്യൂഡൽഹിയിൽ നടന്ന ഉന്നതതല യോഗത്തിലാണ് ദ്വീപ് സമൂഹങ്ങളുടെ വികസനം മുൻനിർത്തിയുള്ള ഈ സുപ്രധാന തീരുമാനമുണ്ടായത്.
മത്സ്യബന്ധന മേഖലയിൽ ലക്ഷദ്വീപിന് പ്രത്യേക പരിഗണന നൽകാനാണ് യോഗത്തിൽ തീരുമാനമായിരിക്കുന്നത്. ദ്വീപുകളിലെ പരമ്പരാഗത മത്സ്യബന്ധന രീതികളെ ആധുനികവൽക്കരിക്കുക, മത്സ്യത്തൊഴിലാളികൾക്ക് മെച്ചപ്പെട്ട സംഭരണ-വിപണന സൗകര്യങ്ങൾ ഒരുക്കുക, ആഴക്കടൽ മത്സ്യബന്ധനത്തിന് ആവശ്യമായ സാങ്കേതിക സഹായങ്ങൾ ലഭ്യമാക്കുക എന്നിവയാണ് പുതിയ പദ്ധതിയിലൂടെ കേന്ദ്ര സർക്കാർ ലക്ഷ്യമിടുന്നത്. ഈ നൂതന പരിഷ്കാരങ്ങൾ നടപ്പിലാകുന്നതോടെ ദ്വീപ് നിവാസികളുടെ പ്രധാന ഉപജീവന മാർഗ്ഗമായ മത്സ്യബന്ധന മേഖലയിൽ വലിയ മുന്നേറ്റമുണ്ടാകുമെന്നാണ് ഫിഷറീസ് വകുപ്പ് വിലയിരുത്തുന്നത്.
