സിഡ്നി: ഓസ്ട്രേലിയയിലെ ലേക്ക് കാർജെല്ലിക്കോയിൽ ഗർഭിണിയായ യുവതിയെയും മറ്റ് രണ്ടുപേരെയും വെടിവെച്ചു കൊലപ്പെടുത്തിയ കേസിലെ പ്രതിയെന്നു സംശയിക്കുന്ന ജൂലിയൻ ഇൻഗ്രാമിന്റെ (37) മൃതദേഹം കണ്ടെത്തി. നാല് മാസമായി പോലീസ് തിരയുന്ന ഇൻഗ്രാമിന്റേതെന്ന് കരുതുന്ന മൃതദേഹം ജീർണ്ണിച്ച നിലയിലാണ് കണ്ടെത്തിയത്. ലേക്ക് കാർജെല്ലിക്കോയിൽ നിന്നും 50 കിലോമീറ്റർ അകലെയുള്ള റൗണ്ട് ഹിൽ നേച്ചർ റിസർവിലെ ഉപേക്ഷിക്കപ്പെട്ട നിലയിലുള്ള വാഹനത്തിന് സമീപത്തു നിന്നാണ് മൃതദേഹം കണ്ടെടുത്തത്.
കഴിഞ്ഞ ജനുവരിയിലാണ് തന്റെ മുൻ പങ്കാളിയായ സോഫി ക്വിൻ, അവരുടെ സുഹൃത്ത് ജോൺ ഹാരിസ്, സോഫിയുടെ അമ്മായി നെരിഡ ക്വിൻ എന്നിവരെ ഇൻഗ്രാം വെടിവെച്ചു കൊന്നത്. കൊലപാതകം നടക്കുമ്പോൾ സോഫി ഏഴ് മാസം ഗർഭിണിയായിരുന്നു. സോഫിയുമായി ബന്ധപ്പെട്ട ഗാർഹിക പീഡനക്കേസുകളിൽ ജാമ്യത്തിലിറങ്ങി നിൽക്കുമ്പോഴാണ് ഇൻഗ്രാം ഈ ക്രൂരകൃത്യം നടത്തിയത്. കൃത്യത്തിന് ശേഷം കാണാതായ ഇയാൾക്കായി വലിയ തോതിലുള്ള തെരച്ചിലാണ് പോലീസ് നടത്തിവന്നിരുന്നത്.
തിങ്കളാഴ്ച ഉച്ചയോടെ വനപ്രദേശത്ത് ഉപേക്ഷിക്കപ്പെട്ട നിലയിൽ കൗൺസിൽ വാഹനവും അതിനടുത്തായി ഒരു തോക്കും മൃതദേഹവും കണ്ടെത്തുകയായിരുന്നു. മൃതദേഹം മാസങ്ങളോളം പഴക്കമുള്ളതായും തിരിച്ചറിയാൻ കഴിയാത്ത വിധം ജീർണ്ണിച്ചതായും അസിസ്റ്റന്റ് കമ്മീഷണർ ആൻഡ്രൂ ഹോളണ്ട് അറിയിച്ചു. മൃതദേഹം ഔദ്യോഗികമായി തിരിച്ചറിയാനുള്ള നടപടികൾ ആരംഭിച്ചു. ഇൻഗ്രാമിനെ പിടികൂടാൻ പോലീസ് മുൻപ് 2,50,000 ഡോളർ പ്രതിഫലം പ്രഖ്യാപിച്ചിരുന്നു.
ഇൻഗ്രാമിനെതിരെയുള്ള പഴയ ഗാർഹിക പീഡന പരാതികൾ ഗൗരവമായി കാണുന്നതിൽ പോലീസിന് വീഴ്ചയുണ്ടായോ എന്നതിനെക്കുറിച്ച് നിലവിൽ അന്വേഷണം നടക്കുന്നുണ്ട്. സോഫിയെ മർദ്ദിച്ച കേസിൽ ഇൻഗ്രാമിന് ജാമ്യം നൽകിയ നടപടിയും മുൻപ് വലിയ വിവാദങ്ങൾക്ക് വഴിവെച്ചിരുന്നു. ഇയാൾക്ക് തോക്ക് എങ്ങനെ ലഭിച്ചു എന്നതിനെക്കുറിച്ചും പോലീസ് വിശദമായ അന്വേഷണം നടത്തുന്നുണ്ട്. ഇൻഗ്രാമിനായുള്ള തെരച്ചിൽ അവസാനിച്ചതോടെ നാല് മാസമായി ഭീതിയിലായിരുന്ന ലേക്ക് കാർജെല്ലിക്കോ നിവാസികൾക്ക് ആശ്വാസമായിരിക്കുകയാണ് ഈ വാർത്ത. പരിസ്ഥിതിക്കും സമൂഹത്തിനും ഭീഷണിയായിരുന്ന ഒരു കേസ് ഇതോടെ അവസാനത്തിലേക്ക് നീങ്ങുകയാണെന്ന് പോലീസ് വ്യക്തമാക്കി
